SCHEI
A chi che ga denaro forte, quando l'è vecio se augura la morte.
Al son de la canpana (schei) ogni dona se fa putana.
Ale làgreme de on erede xe mato chi che ghe crede.
A torghene e no metarghene ogni mucio cala.
Articolo quinto: chi che ga i schei ga senpre vinto.
Bisogna fare la spesa secondo l'entrata.
Bon marcà sbrega la borsa.
Botega de canton fà schei ogni cojon.
Cadena tirà fà la pase in ca'.
Chi ara fondo guadagna on mondo.
Chi che bastona el so cavalo bastona la so scarsela.
Chi che dispreza conpra.
Chi che ga paura del diavolo no fà schei.
Chi che ga schei ga senpre rason.
Chi che ghe n'a ghe ne spende.
Chi che paga avanti el trato, servizio mal fato.
Chi fida nel loto no magna de coto.
Chi ga canpi canpa.
Chi no tien conto de on scheo, no vale on scheo.
Chi òrdena paga.
Chi pì spende manco spende.
Chi sbaglia de testa paga de scarsela.
Chi sparagna el gato magna.
Chi sparte e no se ne tien, el Signore no ghe vole gnanca ben.
Chi va al marcà co pochi schei li spende male.
Chi vol vèndare mete in mostra.
Co zento pensieri no se paga on scheo de debito.
Co' no ghe n'è, spèndarne; co' ghe n'è tegner da conto.
Co' piase la roba no se varda la spesa.
Co' se ga da pagare se cata tuti, co' se ga da tirare no se cata nissuni.
Co' se guadagna se magna.
Conpra poco e guadagna tanto.
Da tristi pagadori se tole ogni moneda.
Debito sputanà, debito pagà.
Dove che ghe xe canpagne ghe xe putane.
El bon vin, i schei e la bravura poco i dura.
El malà no magna gnente e 'l magna tuto.
El marzaro*, prima el fà i schei e dopo la cossienza.
Fare i mistieri che no se conosse i dìnari i deventa mosche.
Fin che dura i bezi*, amighi no manca. * schei
I cojuni del can e i schei del vilan i xe i primi mostrà.
I doluri xe come i schei: chi che li ga se li tien.
I schei fà balare i sorzi.
I schei no i ga ganbe ma i core.
I schei porta l'oca al paron.
I schei vien de passo e i va al galopo.
I siuri ga el paradiso de qua e quelo de là i se lo conpra.
In casa strinzi, in viajo spendi, in malatia spandi.
L'amore xe potente, ma l'oro onipotente.
L'avaro farìa de manco de cagare par no butare via gnanca quela.
L'omo da vin no 'l vale on quatrin.
L'omo pì bruto xe quelo che ga le scarsèle roverse.
L'oro no ciapa macia.
La coéga cola sol lardo.
La merda fà schei.
La pignata de l'artesan, se no la boje oncuò la boje doman.
La roba no xe de chi che la fà, ma de chi che la gode.
La roba ordenà la vol èssare pagà.
Mèjo 'vere du schei de mona che passare par massa svejo.
No ghe n’è mai a bastanza se no ghe ne vanza.
No spèndare tuto quelo che se ga, no dire tuto quelo che se sa.
On bel ciapare fà on bel spèndare.
On bon vèndare fà on bon guadagno.
Oro bon no ciapa macia.
Pare che guadagna, fioi che magna.
Quelo che no vien dala porta vien da l'orto.
Salute,amore, schei e tenpo par gòdarli.
Schei de zogo sta on ora par logo.
Schei e amicissia orba la giustissia.
Schei, poderi e canpi e na bela coa davanti.
Se fà spira la man drita, schei da dare; se fà spira la man zanca, schei da tirare.
Senza schei no se spende, senza laoro se dipende.
Senza stola no se confessa, senza schei no se canta messa.
Spendi la moneda par quelo che la vale.
Tuti i mistieri fà le spese.
STAJON
A l'istà piove a contrà.
A San Clemente l'inverno mete el dente.(23/11)
Beato l'Istà co tuti i pulzi e i zìmesi che'l ga.
Candelora, de l'inverno semo fora, ma se piove e tira vento de l'inverno semo drento.
Cativo inverno, cativo istà.
Chi no sa cossa che xe l'inferno, fassa el cogo d'istà e 'l caretier d'inverno.
Co l'Adolorata se va verso l'invernata.
Co' canta el ciò xe finio de far filò.
Co' névega sola foja l'è on inverno che fa oja.
Co’ te senti le racolete cantare xe rivà la Primavera.
De istà ogni beco fà late, de inverno gnanca le bone vache.
El capon xe senpre de stajon.
El marangon laora senza stajon.
Febraro inevà fà bela l'istà.
Fin a Nadale fredo no fà: braghe da istà; dopo Nadale el fredo xe passà, braghe da istà.
I dì dela merla l'inverno te dà na sberla.
I du Santi del giazo: San Luigino e San Paolino i porta l'Inverno de Giugno.
In istà la vache va in montagna a fare le siore, e le siore va in montagna a fare le vache.
L'inverno l'è el boia di' veci, el purgatorio di' putei e l'inferno di' poariti.
L'istà de San Martin dura tri dì e on pochetin.
L'onbra d'istà fà male ala panza d'inverno.
La piova de primavera ghe ronpe la rogna ala tera.
La piova del'Assension fà bela la stajon.
Miti le straze int'on canton che vegnarà la so stajon.
Né de inverno, né de istà tabaro e onbrela mai a ca'.
O dal cao o dala coa l'inverno vol dire la soa.
Pan, vin e zoca, lassa pur che'l fioca.
Par el seco xe bona anca la tenpesta.
Par San Barnabà el dì pì longo de l'Istà.
Par San Matio le jornade torna indrio.
Pèrsego e melon tuto ala so' stajon.
Piova d'Istà, beati che che la ga.
Piove pì àneme al'inferno che neve de inverno.
Primavera de Jenaro la ruina el persegaro
Primo de Agosto, capo de inverno.
Quando che piove el dì de San Gorgon, piove par na stajon. (9/9)
Quando che te magni la nèspola, pianzi.
Quando che'l sorgo rosso el mostra el muso, xe ora de tore la roca e el fuso.
Quando el Venda fa el pan, se no piove oncuò, piove doman.
Quando le done fa la lissia sola via, l'inverno sbrissa via.
Se piove a San Gregorion, piove tuta la stajon. (3/9)
Stajon de erba, stajon de merda.
Stropa longa, inverno longo; stropa curta, inverno curto.
Vin, done e maroni bisogna gòdarli so' la so stajon.